IET
GALICIA
Área de
estudos e investigación
Para o desenvolvemento das funcións que lle son
encomendadas, Turismo de Galicia conta coa Área de estudos e investigación que
se engloba dentro da Dirección de competitividade, coas seguintes
funcións:
• Realización e difusión das operacións e actividades
estatísticas oficias en materia turística do Plan galego de estatística
• Realización de estudos de investigación de oferta,
demanda, impacto económico, análise de tendencias e estudos sectoriais estratéxicos
da política turística galega.
• Análise da información e da opinión do público
cliente (opinión web, oficinas de turismo).
• Explotación e análise de datos de fontes secundarias
en materia turística.
• Estudo da capacidade competitiva das empresas do
sector.
• Participación na transferencia de investigación
entre os centros públicos de investigación e as empresas do sector turístico.
• Aqueloutras funcións que, dentro do seu ámbito, lle
sexan asignadas pola Dirección da Axencia.
Liñas de
actuación
Co fin de dar resposta aos obxectivos estratéxicos
antes definidos a área de estudos e investigación desenvolve unha serie de
liñas de traballo e investigación, centradas principalmente no eido da análise
estatística e na xeración de coñecemento no ámbito do turismo da nosa
comunidade. En particular, as liñas estratéxicas de actuación do centro son:
• Posta en marcha e desenvolvemento do Observatorio do
Turismo de Galicia, proxecto de carácter estratéxico que pretende servir de
referencia a nivel da comunidade autónoma na xeración e interpretación de datos
estatísticos relacionados co sector.
• Elaboración de proxectos técnicos encamiñados á
mellora metodolóxica das operacións estatísticas vinculados ao turismo en
Galicia.
• Elaboración de estudos e informes de caracterización
e dinámica conxuntural do turismo na nosa comunidade.
• Elaboración de planos de desenvolvemento turístico a
nivel local.
• Difusión e divulgación dos resultados de
investigación, tanto do propio centro coma doutros organismos que xeren información
en Galicia vinculada ao turismo (universidades, grupos de investigación...)
• Colaboración con outros organismos e entidades na
elaboración de estudos e diagnósticos do sector así como na definición de
estratexias de desenvolvemento no eido do turismo.
Análise da demanda turística
A análise da demanda turística ofrece datos de perfil
e caracterización empregando como fontes de datos operacións estatísticas
incluídas no Plan Galego de Estatística, así como outro tipo de estatísticas
pertencentes a diferentes organismos. Inclúense aquí, polo tanto, a Enquisa
de Demanda Turística en Destino ou a Enquisa de Excursionismo. A partir
de aquí a información complementarase cos datos ofrecidos por outros organismos
de carácter local ou de orde superior (Observatorios Turísticos).
Medición económica do turismo
Dentro do Observatorio Turístico de Galicia está a
liña de traballo que pretende ofrecer, con carácter periódico, estimacións de
carácter económico tanto no referente ao lado da demanda como ao lado da
oferta.
• Polo lado da demanda a información referida ao gasto
efectuado polos visitantes durante a súa viaxe a Galicia.
• Polo lado da oferta, información sobre o as empresas
e as actividades económicas do turismo, así como o emprego que xeran.
Estudos e proxectos
De forma complementaria ás liñas de traballo do
Observatorio do Turismo de Galicia, lévanse a cabo tamén outro tipo de
traballos dentro da Área de estudos e investigación que non
forman parte estritamente do observatorio. Poden destacarse neste caso varios
tipos de traballos:
Aqueles que poden ser labores de planificación
turística, elaborando plans directores e plans estratéxicos de turismo naqueles
municipios ou destinos que así o precisen, ou en todo caso colaborando cos
mesmos na elaboración de diagnósticos e na definición das estratexias e
actuacións turísticas. Ditas liñas de traballo poden ser reformuladas e
ampliadas na medida en que:
• As fontes de información secundarias, froito de
diferentes acordos de colaboración, fornezan de máis e mellores datos
estatísticos
• A capacidade de análise e interpretación dos datos
e, por tanto, a xeración de coñecemento, mellore coa incorporación de novas
ferramentas e métodos de traballo.
Por outra banda, a propia dinámica investigadora e os
cambios do sector van xerar novas necesidades de información que
deben responderse con novas liñas de traballo. Neste sentido, algunhas
propostas son:
• Análise e estudo dos produtos turísticos de Galicia:
turismo de saúde, turismo rural e de interior, turismo urbano e cultural,
turismo de congresos, turismo náutico,...
• Estudos de mercado específicos: por procedencia,
motivacións da viaxe ou outras variables de segmentación.
• Elaboración da Conta Satélite de Galicia e análise
dos impactos económicos do turismo.
• Medición e análise dos cambios tecnolóxicos e de
innovación no sector turístico.
Álvaro González
